रामदेव पधारया देवल मायने आया रे देवगढ़ रे माय - MadhurBhajans मधुर भजन

रामदेव पधारया देवल मायने
हे आया रे देवगढ़ रे माय
हे रामदेव पधार्या देवल मायने भाईडा
हे आया रे देवगढ़ रे माय ओ जी हा।।


हे लालजी खेड़ा मे मिन्दर सोवनो भाईडा
ए दुनिया आवे है दर्शन ताय ओ जी हा
हे सुता फेबसिंह ने सपनो आवियो भाईडा
हे दिखे बाबो लीले रो असवार ओ जी हा।।


हे सपनो जाने ने बातो भूलग्यो भाईडा
हे करवा रे लागा रे नजरो पार ओ जी हा
हे मिन्दर बनानो थारा गाँव में भाईडा
हे भगत हो जावो नी तैयार ओ जी हा।।


हे परचो दिखलायो बाबा रामदेव भाईडा
हे आँखीया मे छायो है अंधकार ओ जी हा
हे माफी मांगेने भगत चालीया भाईडा
हे आवे आवे गाँव खेड़ा रे माय ओ जी हा।।









हे ब्राह्मण बनने आया रामदेव भाईडा
हे एक थेलो दियो रे सम्भलाय ओ जी हा
हे जगह बताई खुद आयने भाईडा
हे दिनी बाबो गुलाल उडाय ओ जी हा।।


हे नखल्या दिराया पुरण सिंह ने भाईडा
हे बाबो दिनो करज चुकाय ओ जी हा
हे बात बताई भोला भगत ने भाईडा
हे बैठो वेतो मुम्बई रे माय ओ जी हा।।


हे हुवो अचंबो सारा शहर में भाईडा
हे कुन गयो रूपीया चुकाय ओ जी हा
हे मुरत घडाई जयपुर मायने भाईडा
हे गाजे रे बाजे सु मंगवाय ओ जी हा।।


हे परचो दिखायो बाबा रामदेव भाईडा
हे थाली पडी सजीयोडी माय ओ जी हा
हे मिन्दर चुनवायो हद सोवनो भाईडा
हे बाबा रो प्यारो दरबार ओ जी हा।।


हे दुखीया रा दुखडा मेटे रामदेव भाईडा
हे महिमा जग में अपरम्पार ओ जी हा
हे आंधा ने देवे बाबो आँखीया भाईडा हे
बांज्या री गोद भराय ओ जी हा।।


हे सांझ सवेरे होवे आरती भाईडा हे
झालर री होवे झनकार ओ जी
हे दर्श दिखावे बाबा रामदेव भाईडा
हे बाबो दुखीया रो दातार ओ जी हा।।


रामदेव पधारया देवल मायने
हे आया रे देवगढ़ रे माय
हे रामदेव पधार्या देवल मायने भाईडा
हे आया रे देवगढ़ रे माय ओ जी हा।।
गायक प्रकाश माली जी।
प्रेषक मनीष सीरवी
9640557818

ramdev padharya deval maayne aaya devgadh maay